28. Gün Naat: SÜLEYMAN ÇELEBİ

طوتدى جهانى سرتسر انوار مصطفى
چون كيم بلوردى دنياده آثار مصطفى

اورلدى جانده نوبت شرع محمدى
طولدى جَنان جِناننه ازهار مصطفى

توحيد سروى روضۀ ايمانده بيتدى خوش
آقدى چو عين حكمت اسرار مصطفى

حق گلشننده اوتدى كيرو وحى بلبلى
رحمت گليله طولدى بو گلزار مصطفى

اولدى مشام عقل و دل و جان معطر اوش
آچلدى چونكه نافۀ كفتار مصطفى

قالمدى قدر و قيمتى در و جواهرك
درلر چو صاچدى لعل درربار مصطفى

بازار كفر و كبر و ضلالت خراب اولوب
هم خوش بزندى شرع ايله بازار مصطفى

دينك چراغى ياندى و ياندى قمو اوده
كفار اهل شرك هپ اغيار مصطفى

گرچه كه يوقدرر بو سليمانده خوش عمل
ليكن آنك اميدى دخى وار مصطفى

سن مصطفايى جان ايله تكرار ايله كيم
نور آرتورر كوكللره تكرار مصطفى

Tutdı cihânı serteser envâr-ı Mustafâ
Çün kim belürdi dünyâda âsâr-ı Mustafầ

Uruldı canda nevbet-i şer'-i Muhammedi
Toldı cenan cinânına ezhâr-ı Mustafâ

Tevhîd servi ravza-i îmânda bitdi hoş
Akdı çü ayn-ı hikmet-i esrâr-ı Mustafâ

Hak gülşeninde ötdi girü vahy bülbüli
Rahmet güliyle toldı bu gülzâr-ı Mustafâ

Oldı meşâm-ı akl u dil ü cân muattar uș
Açıldı çünki nâfe-i güftâr-ı Mustafa

Kalmadı kadr u kıymeti dürr ü cevâhirün
Dürler çü sacdı la'l-i dürer-bâr-ı Mustafâ

Bâzâr-ı küfr ü kibr ü dalâlet harâb olup
Hem hoş bezendi şer'ile bâzâr-ı Mustafâ

Dînün çerâğı yandı vü yandı kamu oda
Küffâr-ı ehl-i şirk heb ağyâr-ı Mustafâ

Gerçi ki yok durur bu Süleymanda hoş amel
Lîkin anun ümîdi dahı vâr Mustafâ

Sen Mustafâyı cân ile tekrâr eyle kim
Nûr arturur gönüllere tekrâr-ı Mustafâ

Süleyman Çelebi