Vesîletü'n Necât 3 - Faslun fi Hilkati Nûr'ın-Nebî Kable Külli Şey

فصل في خلقت نور النبي قبل كل شيء

 

اوّل آكدق آنى كيم اوّلدر اول
اولنه بولمدى هيچ عقل يول

 

اولك اول اوليدر بى‌گمان
آخرك هم آخريدر جاودان

 

چونكه حق اوللكن بيلدڭ عيان
ديكله ايمدى قيله‌يم صنعن بيان

 

حق تعالى نه ياراتدى اولا
جمله مخلوقدن كيم اول اوّل اولا

 

مصطفى نورينى اول قيلدى وار
سودى آنى اول كريم و كردكار

 

هر نه دورلو كيم سعادت واردرر
يخشى خوى وكركلى عادت واردرر

 

حق آكا ويردى مكمل ايله‌دى
يارادلمشدن مفضل ايله‌دى

 

آندن اولدى هر نهان و آشكار
عرش و فرش و يرده كوكده نه كه وار

 

كر محمد اولميا ايدى عيان
اولمييسردى زمين و آسمان

 

هم وسيله اولديغيچون اول رسول
آدمك حق توبه‌سن قيلدى قبول

 

كر محمد كلمسه‌يدى عالمه
تاج عزت ايرمز ايدى آدمه

 

نوح آنكچون غرقدن بولدى نجات
دخى طوغمدن كورندى معجزات

 

جمله آنك دوستلغنه آدينه
بونجه عزت قيلدى حق اجدادينه

 

جدى اولديغيچون آنك هم خليل
نارى جنت قيلدى آكا اول جليل

 

هم دخى موسى النده‌كى عصا
اولدى آنك حرمتنه اژدها

 

ئولميوب عيسى كوكه بولديغى يول
امتندن اولمق ايچون ايدى اول

 

گرچه كيم بونلر دخى مرسلدرر
ليك احمد اكمل و افضلدرر

 

چوق تمنى قيلديلر حقدن بولر
كيم محمد امتندن اوله‌لر

 

شرعنى طوت امتى اول امتى
تا نصيب اوله سكا حق رحمتى

 

 

 

Faslun fi Hilkati Nûr'ın-Nebî Kable Külli Şey

 

Evvel andık anı kim evveldir ol
Evveline bulmadı hiç akl yol

 

Evvelin ol evvelidir bî-gümân
Âhirin hem âhiridir câvidân

 

Çünki Hak evvelliğin bildin ayân
Dinle imdi kılayım sun'ın beyân

 

Hak teâlâ ne yaratdı evvelâ
Cümle mahlûkdan kim ol evvel ola

 

Mustafâ nûrunu evvel kıldı var
Sevdi anı ol Kerîm ü Kird-gâr

 

Her ne dürlü kim saâdet vardurur
Yahşi hûy gerekli âdet vardurur

 

Hak ana verdi mükemmel eyledi
Yaradılmışdan mufaddal eyledi

 

Andan oldu her nihân ü âşikâr
Arş ü ferş ü yerde gökde ne ki var

 

Ger Muhammed olmaya idi ayân
Olmayıserdi zemin ü asuman

 

Hem vesile olduğıyçün ol Rasûl
Âdem'in Hak tövbesin kıldı kabûl

 

Ger Muhammed gelmeseydi âleme
Tâc-ı izzet irmez idi Âdem'e

 

Nûh anınçün garkdan buldu necât
Dahi doğmadan göründü mu'cizât

 

Cümle anın dostluğına adına
Bunca izzet kıldı Hak ecdâdına

 

Ceddi olduğıyçün anın hem Halîl
Nârı cennet kıldı ana Ol Celîl

 

Hem dahi Mûsâ elindeki asâ
Oldu anın hürmetine ejdehâ

 

Ölmeyüp Îsâ göğe bulduğı yol
Ümmetinden olmak içün idi ol

 

Gerçi kim bunlar dahi mürseldürür
Lîk Ahmed ekmel ü efdaldürür

 

Çok temennî kıldılar Hak'dan bular
Kim Muhammed ümmetinden olalar

 

Şer'ini tut ümmeti ol ümmeti
Tâ nasîb ola sana Hak rahmeti

 

-------------------------------------------------------

Bî-Gümân: Şüphesiz.
Câvidân: Ebedi, sonsuz.
Sun'ın: Sun'unu, yarattıklarını.
Kird-gâr: Allah.
Vardurur: Vardır.
Mufaddal: Daha faziletli.
Nihân-u âşikâr: Gizli Ve Açık.
Ger: Eğer.
Olmayıserdi: Olmayacaktı.
Zemin-ü âsumân: Yer ve gök.
Garkdan: Boğulmakdan.
Halîl: İbrahim Aleyhi's-Selam.
Celîl: Büyüklük Sahibi, Allah.
Ejdehâ: Ejderhâ.
Mürseldürür: Mürseldir, peygamberdir.
Efdaldurur: Efdaldır, daha faziletlidir.
Lîk: Lakin, ama.
Şer'ini: Şeriatını, dinini.

 

 

Kaynak:
Süleyman Çelebi ve Mevlid  - Bilal Kemikli (2018 Mart-İstanbul) Türkçeyi Kuranlar Serisi KETEBE Yayınları Sayfa: 28

 

Resim ve Ressam: Karacaahmet, Nazmi Ziya GÜRAN

Eskimez Yazıya Çeviren: Fatih KABLAN - Hüseyin SAYKILI
Editör: Abdurrahim ÇAYLAR