6. Gün Naat: SÜLEYMÂN NAHÎFÎ

ايا بِهينْ گهرِ حكمت السلام عليك

يتيمهٔ صدفِ قدرت السلام عليك

​وجودِ پاكڭى فضلندن ايله‌دى الله

جهانه واسطهٔ رحمت السلام عليك

​ضعيفِ امته سنسين شفيعِ روزِ جزا

فدا سنڭ يولڭه امت السلام عليك

​محال بر قيلڭڭ مدحتنده حقِ ادا

جهان ايدرسه نيچه دقت السلام عليك

​كوزمده اشكِ ندامت جگرده داغِ بلا

گوڭلده تاب و تبِ حيرت السلام عليك

​ميسر اولماز ايسه رويمالِ درگاهڭ

هلاك ايدر بنى بو حسرت السلام عليك

​فراقڭ اولمه‌ده عشاقه دوزخِ جانسوز

ايا وصالى اولان جنت السلام عليك

​روا مى بلبلِ گلزارِ نعتِ پاكڭ اوله

خموشِ داغدغهٔ محنت السلام عليك

​دگلمی‌يم دخى شايانِ مرهمِ وصلت

بنى بو حاله قودى فرقت السلام عليك

​امان امان جگرم ياقدى آتشِ هجران

زلالِ وصلته قيل همت السلام عليك

​گوڭلده خواهشِ رومالِ درگهِ لطفڭ

درونده داعيهٔ وصلت السلام عليك

​غبارِ درگهڭ اولمقلغه قبول ايله

بو خاكِ پايڭه قيل شفقت السلام عليك

​نثارِ جان ايده‌يم آستانِ پاكڭده

درونِ دلده بودر نيت السلام عليك

​نه دڭلو مجرم ايسه‌م عرصه‌گاهِ محشرده

خدادن ايله بنى منت السلام عليك

​سزاىِ شفقت ايدرسه‌ڭ نحيفئِ زارى

آڭا يتر شرف و عزت السلام عليك

Naatın orjinal nüshası

Eyâ bihîn güher-i hikmet es-selâmu aleyk

Yetîme-i sadef-i kudret es-selâmu aleyk

Vücûd-ı pâkini fazlından eyledi Allâh

Cihâna vâsıta-i rahmet es-selâmu aleyk

Za’îf-i ümmete sensin şefî’-i rûz-ı cezâ

Fedâ senin yoluna ümmet es-selâmu aleyk

Muhâl bir kılının midhatinde hakk-ı edâ

Cihân ederse nice dikkat es-selâmu aleyk

Gözümde eşk-i nedâmet ciğerde dâğ-ı belâ

Gönülde tâb-ı teb-i hayret es-selâmu aleyk

Müyesser olmaz ise rûy-mâl-i dergâhın

Helâk eder beni bu hasret es-selâmu aleyk

Firâkın olmada uşşâka dûzah-ı cân-sûz

Eyâ visâli olan cennet es-selâmu aleyk

Revâ mı bülbül-i gülzâr-ı na’t-i pâkin ola

Hamûş-ı dâğdağa-i mihnet es-selâmu aleyk

Değil miyim dahı şâyân-ı merhem-i vuslat

Beni bu hâle kodı firkat es-selâmu aleyk

Amân amân ciğerim yakdı âteş-i hicrân

Zülâl-i vuslata kıl himmet es-selâmu aleyk

Gönülde hâhiş-i rû-mâl-i dergeh-i lütfun

Derûnda dâ’iye-i vuslat es-selâmu aleyk

Gubâr-ı dergehin olmaklığa kabûl eyle

Bu hâk-i pâyine kıl şefkat es-selâmu aleyk

Nisâr-ı cân edeyim âsitân-ı pâkinde

Derûn-ı dilde budur niyyet es-selâmu aleyk

Ne denli mücrim isem arsagâh-ı mahşerde

Hudâdan eyle beni minnet es-selâmu aleyk

Sezâ-yı şefkat edersen Nahîfî-i zârı

Ona yeter şeref ü izzet es-selâmu aleyk 

Süleymân Nahîfî, Na’t ve Mi’râciye Mecmûası, s. 181-182