7. Gün Naat: MANASTIRLI SÂLİH FÂİK

اولورمى غيرى سوز وصفڭده لايق يا رسول الله

سنڭ مدحڭ ايدركن ربِ خالق يا رسول الله

​دو عالم اولمسونمى حسنڭڭ مفتونى كيم بالذات

جمالِ پاكڭه الله عاشق يا رسول الله

​ازلدن تا ابد دلبسته‌در عشقڭ ايله كونَين

برى مجنونڭ اولمش برى وامق يا رسول الله

​گورنمز خاكده محدود سايه‌ڭ چونكه سايه‌ڭله

پُر اولمشدر مغاربله مشارق يا رسول الله

​وجودڭ آفتابِ اوجِ آفاقِ نبوتدر

نوله گورمز ايسه چشمِ منافق يا رسول الله

​شرفيابِ سُمِ شبديزڭ اولمشدر مگر بر شب

آنڭله مفتخردر نُه سُرادق يا رسول الله

​قيامتده شِفاهِ شفقتڭ ايتمز ايسه تحريك

قالور دمبستۀ ضُجرت خلايق يا رسول الله

​عبادت اولسه ده بى‌شبهه شايان قبول اولماز

رضاڭه اولماز ايسه گر موافق يا رسول الله

​اولورسه مظهرِ نيم التفاتِ لطفڭ اول آنده

ايدر حقه تقرب شخصِ فاسق يا رسول الله

​عنايت ايله استخلاصنه بيچاره بنده‌ڭدر

اسيرِ جيشِ عصيان اولدى فائق يا رسول الله

Olur mı gayrı söz vasfında lâyık yâ Resûlallâh

Senin medhin iderken Rabb-i Hâlık yā Resûlallâh

Dü 'âlem olmasun mı hüsnünün meftûnı kim bi'z-zat

Cemâl-i pâkine Allâh 'âşık yâ Resûlallâh

Ezelden tâ ebed dil-bestedir 'aşkın ile kevneyn

Biri Mecnûn'ın olmuş biri Vâmık yâ Resûlallâh

Görünmez hâkde mahdûd sâyen çünki sâyenle

Pür olmuşdur megârible meşârik yâ Resûlallâh

Vücûdın âfitâb-ı evc-i âfâk-ı nübüvvetdir

N'ola görmez ise çeşm-i münâfık yâ Resûlallâh

Şerefyâb-ı süm-i şeb-dîzin olmuşdur meger bir şeb

Anınla müftehirdir nüh surâdık yâ Resûlallâh

Kıyâmetde şifâh-ı şefkatin itmez isen tahrîk

Kalur dem-beste-i zucret halâyık yâ Resûlallâh

'İbâdet olsa da bî-şübhe şâyân-ı kabûl olmaz

Rızâna olmaz ise ger muvâfik yâ Resûlullâh

Olursa mazhar-ı nîm-iltifât-ı lutfin ol anda

İder Hakk'a takarrüb şahs-ı fâsık yâ Resûlallâh

'İnâyet eyle istihlâsına bî-çâre bendendir

Esîr-i ceyş-i 'isyân oldı Fâ'ik yâ Resûlallâh

Manastırlı Sâlih Fâik Dîvânı, s. 57-58