NUTK-İ ŞERÎF

نطق شريف

​جان بوله جاناننى
بايرام او بايرام اوله
قول بوله سلطاننى
بايرام او بايرام اوله

​حزن و كدر دفع اوله
دلده حجاب رفع اوله
جمله كناه عفو اوله
بايرام او بايرام اوله

​مولا بزى عفو ايده
كور نه كوزل عيد اوله
جرم و خطالر گيده
بايرام او بايرام اوله

​فيض محبت حق
نور هدايت سياق
جنت اعلى طوراق
بايرام او بايرام اوله

​حقّى سون مرد شير
قلبى اولور مستنير
الله اوله دستكير
بايرام او بايرام اوله

​ال طوته كتابنى
ديل طوته خطابنى
جان طوته شتابنى
بايرام او بايرام اوله

​مولايى جاندن سون
رضاى حقّه ايرن
لطفى خدايه كوكن
بايرام او بايرام اوله

​حقّى سون دل و جان
عشقى ايدن هيجان
فتح اوله باب جنان
بايرام او بايرام اوله

​غنيلر ايده كرم
رفع اوله درد ورم
سخى اوله محترم
بايرام او بايرام اوله

​نور هدايت طوله
دلده هدايت بوله
ناصرك الله اوله
بايرام او بايرام اوله

​توحيد ايده ذوق ايله
حقّى سوه شوق ايله
تصديق اينرسه دله
بايرام او بايرام اوله

​دلده‌كى رحمان اوله
دردلره درمان اوله
آزاده فرمان اوله
بايرام او بايرام اوله

​لطفى‌يه لطف و كرم
داخل باب حرم
دائما الله ديرم
بايرام او بايرام اوله

NUTK-İ ŞERÎF

Cân bula cânânını
Bayrâm o bayrâm ola
Kul bula sultânını
Bayrâm o bayrâm ola

Hüzn ü keder def' ola
Dilde hicâb ref' ola
Cümle günâh af ola
Bayrâm o bayrâm ola

Mevlâ bizi afv ede
Gör ne güzel 'ıyd ola
Cürm ü hatâlar gide
Bayrâm o bayrâm ola

Feyz-i mehabbet-i Hakk
Nur-i hidâyet siyâk
Cennet-i a'lâ durak
Bayrâm o bayrâm ola

Hakk'ı seven merd-i şîr
Kalbi olur müstenîr
Allah ola destigîr
Bayrâm o bayrâm ola

El tuta kitâbını
Dil tuta hitâbını
Cân tuta şitâbını
Bayrâm o bayrâm ola

Mevlâ'yı cândan seven
Rızâ-yı Hakk’a eren
Lutf-i Hudâ'ya güven
Bayrâm o bayrâm ola

Hakk’ı seven dil ü cân
Aşkı eden heyecân
Feth ola bâb-ı cinân
Bayrâm o bayrâm ola

Ganîler ede kerem
Ref’ ola derd-i verem
Sahî ola muhterem
Bayrâm o bayrâm ola

Nûr-i hidayet dola
Dilde hidâyet bula
Nâsırın Allah ola
Bayrâm o bayrâm ola

Tevhîd ede zevk ile
Hakk’ı seve şevk ile
Tasdîk inerse dile
Bayrâm o bayrâm ola

Dildeki Rahmân ola
Derdlere dermân ola
Âzâde fermân ola
Bayrâm o bayrâm ola

Lutfî’ye lutf u kerem
Dâhil-i bâb-ı harem
Dâima Allah direm
Bayrâm o bayrâm ola

Alvarlı Efe Muhammed Lutfî